LAOAG CITY – Ginutigot ni Senador Robinhood Padilla ti Department of Education, National Commission for Culture and the Arts ken ti National Historical Commission of the Philippines a mangbukel ti “enhanced Rizal program” iti basic education curriculum.
Ti rakurak ni Padilla ket tapno maipasigurado a maipaadal kadagiti Pilipino kabayatan nga ubbingda pay laeng dagiti ugali ti nailian a banuar a ni Dr. Jose Rizal.
Inbatadna a saan a maiganatadan ti kinapateg dagiti naaramid ni Rizal iti pakasaritaan ti pagilian ken dagiti obrana ket agtalinaed nga inspirasion iti adu nga henerasion dagiti Pilipino.
Kunana a naidasar ti daniw ni Rizal a “To the Filipino Youth” ti kabaelan dagiti agtutubo ken nagutigotda nga usaren ti kabaelanda tapno tumulong kadagiti agkasapulan.
Iti agdama, kuna ni Padilla a dagiti kasuratan ni Rizal maipapan iti panagayat iti pagilian ket karaman kadagiti maisursuro iti Grade I agingga Grade VI.
Kabayatanna, ti “Noli Me Tangere” ken “El Filibusterismo” ket “required reading” iti third ken fourth year iti high school.
