LAOAG CITY – Agsagsagana ti Environment and Natural Resources Office wenno ENRO ti Ilocos Norte iti pannakaipalawa dagiti kabanbantayan a mamulaan ti nagdumaduma ti klasena a kayo iti babaen ti “greening program” ti probinsia.
Segun ken ni Mr. Hashler Garalde iti nasao a pangopisinaan, kalikagum ni Gob. Matthew Marcos Manotoc nga agtultuloy ti panagmula kadagiti nagduduma ti klasena a kayo kadagiti kabanbantayan.
Inbatadna a paset daytoy iti naiget a tarigagay ti gobernador a mamulaan dagiti agkalkalbo a kabanbantayan ditoy probinsia.
Inlawlawagna nga iti pannakadanonen iti panawen ti panagtutudo ket addan dagiti nakasagana a napatubo a nagdumaduma a klase ti kayo a maimula.
Nupay kasta, inlawlawagna a manarimaan pay laeng ti “evaluation” wenno pannakatingiting dagiti naimula a kayo iti nagdumaduma a paset ti Ilocos Norte.
Kunana a babaen iti daytoy ket makita ti balor dagiti nadakamat a kayo kalpasan ti lima wenno nasursuruk pay a tawen.
Innayonna a malaksid a saluadan dagitoy dagiti “watershed areas” ti probinsia ket mabalin pay a pakabenipisiaran dagiti nadakamat a kaykayo kangrunaanna kadagiti “timber” ken dagiti agbunga a kaykayo.
