LAOAG CITY – Nagballaag ni Mrs. Estrella Baby Sacro iti Environment and Natural Resources Office (ENRO) kadagiti agpupuur ditoy probinsya nga ad-adda pay a paigetan da ti maipatpatungpal a pagalagadan para iti pannakasalwad ti aglawlaw.
Inaramid daytoy ni Sacro kalpasan nga adda dagiti naaktwan da a sumagmamano a mannalon nga agpupuur iti taltalon, partikular iti ili ti Sarrat ken Dingras.
Inbatad ni Sacro a no adda dagiti makita da nga agpupuur ket multaen da a dagus ken no saan a makabayad dagiti maseknan ket mabalin a mabalud da.
Malaksid kadagiti mismo a nagpuur ket uray ti kapitan nga akinsakop iti nasao a lugar ket mapatawan ti sanction.
Inpalagip ni Sacro a basar iti Provincial Ordinance 055-2017, no damo a matiliw gapu iti panagpupuur ti maysa nga indibidual ket mamulta ti 500 a pisos, ngem no uliten na manen ket maipangato manen ti multa na.
Kabayatanna, inpakaammo ni Sacro a dagiti naaktwan da nga agpupuur kadagiti nasao nga ili ket mapatuludan da ti surat ngem gapu ta damo da ket bagbagaan da pay laeng dagitoy.
Nupay kasta, no uliten da manen ti inaramid da ket irekomendar danto dagitoyen iti DILG ken mabalin pay mairekomendar daytoy iti Ombudsman.
Immapela met ni Sacro kadagiti umili nga agtitinnulong koma a mangsalwad iti aglawlaw.
