LAOAG CITY – Manarimaanen ti panakaproseso ti implementasyon ti naipasa a resolusyon iti Sangguniang Panlalawigan, no sadinno nga inaprobaran met ni Goverenor Matthew Marcos Manotoc a panakasingir t entrance fee kadagiti sumsumrek iti Ferdinand Edralin Marcos Stadium.
Daytoy ti inpakaamo ni Ms. Mildred Nirmla Lamoste iti secretary ti Sang Panlalawigan.
Segun ken Lamoste, nailanad iti nasao a resolusyon a dagiti walk-in client ket agbayad ti 30 a pisos no nataengan, 10 a pisos no ubing nga agtayag ti uppat a kadapan bayat a libre kadagiti ubbing nga agtayag ti nababbaba ngem uppat a kadapan pakairamanan dagiti Senior Citizen ken person’s with disability.
Kunana a makita pay iti nasao a resolusyon ti renta a bayadan dagiti agkalikagom a mangusar iti stadium tapno isu ti pagpraktisan da ken pagiwayatan da ti nagduduma a programa.
Kunana a dagiti makolektarda ket mausar paara iti panakamentenar ti nasao a pasdek.
Kabayatanna, impakaammo ni Lamoste a target da ti pormal a pannaka-implementarna daytoy inton umay a bulan ti Pebrero.
