LAOAG CITY – Balligi ti naiyuswat nga entrapment operation iti maysa nga hotel iti Brgy. Buttong ditoy siudad ti Laoag babaen kadagiti kameng ti National Bureau of Investigastion.
Segun ken ni Agent Hilario Manding iti NBI Regional Office 1, namunganay ti pannakaiyuswat ti operasyon kalpasan a nagkamang iti opisina da ti biktima a naasawaan ken residente iti Brgy. Cabungaan-B ditoy siudad.
Kuna na a kangrunaan nga inreklamo ti biktima ket ti maipagarup a panangpangta ti suspek a tricycle driver, addaan ti live-in partner ken residente iti Brgy. Casili a maiwaras ti video scandal da nu saan a makipagkita.
Gapu iti daytoy, inbatad na a naiyuswat a dagus ti operasyon ken nakemmeg nga awan met iti panagkedked na ti suspek.
Immuna iti daytoy, inpakaammo ni Manding a basar iti rakurak ti biktima, Oktubre itay napan a tawen a nangrugi ti panagkitkita da iti suspek kalpasan a nagam-ammo dagitoy iti facebook.
Kuna na a dita met a nangrugi ti panagturong da iti hotel ken naulit iti namin ado a daras.
Mainaig iti daytoy, inbatad ni Manding nga adda ti iggem a video ti suspek ken isu maipagarup a panagbalin na a pamutbuteng iti biktima ken iwaras na daytoy nu saan a sumurot wenno makipagkita kenkuana.
Kabayatanna, inpetteng ti suspek a nagpabigbig iti nagan a Jomar Aquino a nabayagen a sinardengan na ti biktima ngem arig a daytoy ti saan a nangsardeng kenkuana.
Kuna na nga adda ti gundaway a kinasarita na a mismo ti asawa ti biktima tapno sardengan na daytoy ngem kaskasdi a saan na a sinardengan daytoy.
Mainaig iti daytoy, inpakaammo na a nu pay adda dagiti saan da a mapagkinkinnaawatan iti biktima nabayagen a napugas ti madakdakamat a video ken awan ti gandat na a mangiwaras.
Kuna ni Aquino nga arig a nai-set up iti laksid a mabalin koma a mapagsasaritaan ken saan nga agtungpal iti reklamo ti personal a riri da.
Iti baet daytoy, inadamitir ni Aquino nga agpada da iti babai nga adda ti nagbasulan na.
Kabayatanna, inpakaammo ni Agent Manding a posible a sumango ti suspek iti kaso a panaglabsing iti Grave Coercion iti Article 286 ti Revised Penal Code, RA 9995 wenno Anti-Photo and Video Voyeurism Act of 2009, RA 9262 wenno VIOLENCE AGAINST WOMEN AND THEIR CHILDREN nu bilang mapaneknekan dagiti akusasyon kontra iti daytoy.
