LAOAG CITY – Inaprobaran ti konseho ditoy ciudad ti Laoag ti maysa a resolusyon a mangaprobar ti aplikasyon ti City Environment and Natural Resources iti Environmental Sanitation Clearance tapno makaestablisar ti gobierno lokal iti sewage treatment plant iti sanitary landfill.
Segun iti chairman ti Committee on Environment and Natural Resources, napateg daytoy tapno saan a makuntaminar iti waste water dagiti danom nga asideg ti sanitary landfill.
Kunana a ti nasao a clearance ti maysa a requirement iti pannakaestablisar ti treatment plant.
Inpakaammo na a ti sanitary landfill ditoy ciudad ti Laoag ket makapartuat ti narugit a danom isut gapuna a kasapulan ti nasao a treatment plant tapno mapapintas ti waste water management ken maliklikan ti water pollution.
Patien ti konseho a babaen iti daytoy ket matulongan dagiti residente a maaddaan ti nadalos nga aglawlaw aglalo iti danom a mausar iti inaldaw-aldaw.
