Nangiparuk-at ti Executive Order No. 25 ni Mayor Maximo Cajigal iti ili ti Badoc.
Daytoy ket seknan ti pannakaipan ti lockdown iti Sitio Proper iti Barangay Paltit ken ti Sitio Centro iti Barangay Lubigan.
Basar iti EO nga adda iti facebook page iti ili ti Badoc, kasapulan a maipatungpal ti naiget a community quarantine ken health protocols kadagiti dadduma a sitio dagiti dua a barangay.
Nailanad iti EO nga adda iti babaen ti Enhanced community quarantine dagiti maibilang a containment zone ti sitio centro iti Barangay Lubigan idinto a dagiti nabatbati a sitio ti dagiti dua a barangay a maiblang a buffer zone ket adda iti babaen ti General Community Quarantine.
Amin a residente nga adda containment zone ket mapalubusan laeng a rumuar iti pagtaengan nu adda ti pammalubos ti kapitan a mapanda gumatang kadagiti kasapulan iti inaldaw idinto a dagiti adda iti buffer zone ket mapalubusan a rumuar iti pagtaengan ngem kasapulan a masurot dagiti health protocols.
Kabayatanna, iti pinermaan nga EO ni Cajigal, mangipaay ti lokal a gpbierno ti Badoc kadagiti kasapulan ti residente iti dua a sitio.
Siasinno man nga aglabsing kadagiti naipalaon a pagalagadan iti nasao nga EO ket mamulta.
Maipalagip a ni IN-67 ket residente iti Sitio Proper iti Barangay Paltit iti ili ti Badoc.
