LAOAG CITY – Saan a makaumanay a rason ti panagtipid iti suhestiyon ti National Economic Development Authority a 4-day work week.
Daytoy ti inbatad ni Mr. Orlino Mandac, maysa nga economist iti Mariano Marcos State University iti siudad ti Batac.
Kuna ni Mandac a malaksid kadagiti empleado ket karaman a saan a nakasagana iti nasao a suhestiyon dagiti mangmangged.
Segun ken ni Mandac, ti lima nga aldaw a panagtrabaho ket kaibatugan ti 40 nga oras a wenno walo nga oras iti kada aldaw.
Kuna na a pudno a makatipid dagiti employers ti kuryente, sweldo ken dadduma pay a mangbibiag iti maysa a kompanya.
Nu pay kasta, inbatad na a ti maysa nga aldaw a maikkat ket kayat na a sawen a manayunan ti dua nga oras iti kada aldaw a panagtrabaho dagiti empleado, banag nga agpada met laeng nu mapagtalinaed ti lima nga aldaw a panagtrabaho.
Malaksid iti daytoy, patien ni Mandac saan nga umiso a maipatungpal ti 4-day work week kadagiti kompanya nga addaan ti kamkamaten a quota wenno deadline.
Kabayatanna, inlawlawag ti economist nga iti biang dagiti empleado, ti nasao a suhestiyon ket nakaro a makaipaay kadagitoy ti stress ken kumikom gapu iti nayun nga oras iti panagtrabaho.
Kuna na a gapu iti daytoy ket masapol a maikonsiderar ti sitwasyon dagiti empleado tapno saan a maapektaran ti kalidad ti trabaho dagitoy.
Inpetteng ni Mandac a nasken a maadal a naimbag ti epekto ti aniaman a suhestisyon ti gobierno sakbay a naan-anay a maipatungpal.
