LAOAG CITY – Posible a makagatangen ti nalaka a bagas mangrugi inton Agosto maibasar iti Department of Agriculture.
Sumangpeten ditoy pagilian dagiti imported a bagas a nababbaba ti presio gapu iti epekto ti Executive Order No. 62 wenno 15% a kissay iti taripa kadagiti maang-angkat a bagas ken dadduma a produkto.
Manamnama a marikna ti pannakakissay ti innem agingga pito a pisos iti presio dagiti imported a bagas basar iti Philippine Statistics Authority.
Maipadalan iti panangtingiting iti kada uppat a bulan no epektibo ti Executive Order tapno mapagtalinaed ti nalaka a bagas ken ad-adda a mabenepisiaran dagiti gumatang.
