Inabatad ni Senador Sherwin Gatchalian a naikeddeng a a maangay ti hearing ti Senate Committee on Basic Education inton Abril 30 tapno pagsasaritaan ti epekto ti nakaro a pudot iti klase ken ti pannakaipatungpal dagiti alternative delivery modes (ADMs).
Insubli ni Gatchalian ti pasamak a nakasuspende ti klase iti adu a lugar gapu iti nakaro a pudot.
Segun iti Philippines Atmospheric, Geophysical and Astronomical Services Administration mabalin a dumanon ti extreme danger heat index ti ti wenno 52 ° Celsius wenno agpangato ti temperatura iti sumagmamano a lugar ti pagilian gapu iti El Niño.
Inpaganetget ti Department of Education (DEPED) nga iti panawen ti didigra wenno kalamidad, agraman ti nakaro a pudot ket mabalin a suspenderen dagiti prinsipal dagiti face-to-face classes ken ipatungpalda ti blended learning.
Iti sidong ti DepEd Order No. 037 s. 2022, mabalin nga ipatungpal ti modular distance learning, performance tasks, wenno make-up classes no agsuspende ti klase.
Kabayatanna, nupay nangrugin ti Department of Education iti in-inut a panagsubli iti dati a school calendar ti pagadalan ket indagadag ni Gatchalian iti ahensia nga adalen no mabalinna nga ipatungpal ti short transition period.
