LAOAG CITY – Inlawlawag ni Mr. Al Laurin, ti presidente ti Drugstores Association of the Philippines (DSAP) Ilocos Norte Chapter dagiti epekto ti online pharmacy.
Daytoy ket kalpasan nga ad-adalen ti Food and Drug Adminstration (FDA) ti posibilidad a pannakaited ti accreditation iti online pharmacy wenno ti panaglako ti agas iti online.
Segun ken ni Laurin, ti napintas nga epekto ti online pharmacy ket al-alisto ti panggatang ti agas.
Nu pay kasta, inpasingked na a babaen iti e-pharmacy ket maikkan ti gundaway dagiti sumagmamano nga online stores a makapaglako nu pay awan dagiti umiso a dokumento kangrunaan ita nga awan pay dagiti naiparuk-at a polisiya.
Gapu iti daytoy, kuna ni Laurin a saan a masigurado nu pudno wenno peke ti lako nga agas a mailako iti online stores.
Kuna na a nasken nga adda ti panagmonitor ti FDA sakbay a maipalubos ti panaglako iti online tapno maliklikan ti panaglako ti peke nga agas wenno scam.
Inbunannag ni Laurin a para kenkuana ket nasay-sayaat nu dagiti met laeng adda ti parmasya na ti mapalubusan nga aglako iti online.
