LAOAG CITY – Napintas a “development” para iti probinsia ti Ilocos Norte ti kaaddan ti direct flight ti Phil. Airlines a Cebu – Laoag ken Laoag – Cebu.
Daytoy ti panangiladawan ni Mr. Ronald Estavillo, airport manager ti Laoag International Airport kalpasan a nairugi ti nasao a rota ti Phil. Airlines idi Disiembre kinse.
Imbatadna a mamindua iti kada lawas ti nasao a flight iti tunggal aldaw ti martes ken biernes.
Segun kenkuana, ti aggapo idiay Cebu ket agluas iti oras ti alas siete trenta y singko iti bigat ken sumangpet iti Laoag International Airport iti oras ti alas diyes singko iti bigat idinto a ti aggapo iti Laoag ket agluas iti oras ti alas diyes beinte singko ti bigat ken dumanon idiay Cebu iti oras ti alas dose trenta y singko ti aldaw.
Segun ken ni Estavillo, dakkel a pagyamanan ken ni Gob. Matthew Marcos Manotoc iti pannakaipatungpal ti nasao a flight.
Kunana a nagasat ti Ilocos Norte iti kaadda ti nagaget a gobernador a nangitandudu iti kaadda ti nasao a direct flight ti Phil. Airlines.
Kabayatanna, pinasingkedanna nga iti agdama ket “fully book” dagiti airlines gapu ta daytoy a bulan ti maibilang a kaadu dagiti turista nga umay pakairamanan dagiti umay agbakasyon a kakailian nga agnanaeden iti ballasiw taaw.
Innayonna a dakkel ti posibilidad nga agtultuloy ti kaadu dagiti aglugan nga agsangpet ken rummuar nga eroplano agingga iti bulan ti Pebrero ken mabalin nga agingga iti panawen ti kalgaw.
