LAOAG CITY – Nagpannawagan ni Senate Committee on Social Justice, Welfare, and Rural Development Chairman Erwin Tulfo kadagiti nagannak ken guardians nga ad-adda a makisarita kadagiti annakda ken saan laeng nga agpannuray iti teknolohia a mangmonitor iti pagimbaganda.
Daytoy ket kalpasan a nasarakan ti paltog iti bag ti maysa nga estudiante iti Grade 9 idiay Pinamungajan, Cebu, ti aldaw laeng kalpasan ti pammaltog iti Ateneo de Zamboanga University (ADZU) a nakatayan ti dua nga estudiante ken nakasugatan ti siam pay. Segun kadagiti otoridad, ti paltog a narekobre idiay Cebu a kukua ti lolo ti estudyante.
Impaganetget ti Senador nga awan ti ubing a mayanak a naranggas.
Kabayatanna, iti isyu ti pannakagun-od dagiti ubbing iti paltog, impetteng ni Tulfo a rumbeng a sungbatan dagiti nagannak nga addaan iti paltog wenno agay-aywan, a mangibati kadagiti armas kadagiti lugar a nalaka a magaw-at dagiti ubbing.
Inbatad na nga iti agdama ket maisagsagana ti gakat a mangipakat ti criminal liability kadagiti negligent gun owners ken custodians.
