LAOAG CITY – Inlungalong ni Navotas Representative Toby Tiangco ti House Resolution (HR) 808 nga agkidkiddaw iti liderato ti Kamara de Representantes nga i-convene ti Committee of the Whole tapno ammoen ti estado ti arrest warrant kontra ken ni dati a Congressman Zaldy Co.
Panpanunoten ni Tiangco no pudno kadi a birbuken dagiti otoridad ni Co gapu ta arig awan ti sense of urgency a biruken ken pagsungbaten daytoy iti pannakairamanna iti korapsion iti budget insertions ken flood control scandal.
Gagem ti imbestigasion a maidatag dagiti nasken nga addang tapno mapaalisto a maarestar dagiti sumangsango iti warrant of arrest nangruna no daytoy ket adda iti ballasiw taaw.
Inbatad ni Tiangco, nasken a nalawag a maammoan no ania nga ahensia ti addaan ti kangrunaan a responsibilidad nga ipatungpal ti arrest warrant kasta pay ti koordinasion iti foreign jurisdictions ken engagement iti international law-enforcement agencies.
Karaman kadagiti kalikagum ni Tiangco a paayaban iti panagdengngeg dagiti opisial ti Department of Justice (DOJ), National Bureau of Investigation (NBI), Bureau of Immigration (BI), Ambassador of Portugal to the Philippines ken dagiti sekretario ti Department of the Interior and Local Government (DILG) ken Department of Foreign Affairs (DFA).
