LAOAG CITY – Indasar ni United States President Joe Biden dagiti baro a proposal tapno malpasen ti riribuk iti nagbaetan ti Israel ken Hamas iti Gaza.
Iti panagbitlana iti White House, addaan ti tallo a paset daytoy, ti umuna ket mangrugi iti innem a lawas a ceasefire no sadino ti nasao a panawen ket nasken nga agsanuden ti Israel Defense Forces manipod iti Gaza.
Nasken payen a wayawayaan ti Hamas dagiti hostage-da tapno makasublin dagiti Palestino a sibilian kadagiti pagtaenganda iti Gaza kagiddan metten ti humanitarian assistance a dumanon iti 600 trucks ti sumrek iti kada aldaw.
Iti maikadua a proposal ket ti pannakawayawaya dagiti nabatbati nga hostage pakairamanan dagiti suldado ken ti full withdrawal dagiti Israeli forces iti Gaza ken ti panag-upgrade para iti naan-anayen a panagsardeng ti riribuk iti Gaza.
Iti maudi ket ceasefire deal ket ti maudi a paset ti pannakawayawaya dagiti hostage iti Gaza ken ti major reconstruction plan iti Gaza no sadino idauloan ti Estados Unidos ken dadduma pay a pagilian a tumulong iti pannakaipasdek dagiti pagtaengan, ospital ken pagadalan a nadadael gapu iti rinnupak.
