LAOAG CITY – Kinondenar ti Estados Unidos, France, United Kingdom ken European Union ti naminsan manen a panangbomba ti water cannon ti barko ti China Coast Guard kadagiti barko ti Pilipinas iti Scarborough shoal.
Mainaig iti daytoy, nangipakita ni United States Ambassador Marykay Carlson ti panangpatibker ti United States government ti suporta daytoy para iti Pilipinas.
Inawagan met ni Europen Union Ambassador Luc Veron ti inaramid ti China Coast Guard a maikanniwas iti international law.
Inbatadna ti napeggad a maniobra, panangbomba ti water cannon, panangikabil kadagiti floating barrier wenno aniaman nga agresibo nga aksion ket pangta iti biag iti kabaybayan, karebbengan iti panaglayag ken pannakaipawil iti panagusar ti puersa.
Iti biang ni British Ambassador Laure Beaufils, inpaganetgetna ti panawagan ti United Kingdom para iti panangrespetar iti United Nations Convention on the Law of the Sea ken iti 2016 Arbitral Award.
Immmannugot met ti French Embassy iti Pilipinas ti apela ti United Kingdom kagiddan ti panangipakita ti panagamak maipapan iti nasao nga insidente.
Maipalagip nga idi Martes, binomba ti China Coast Guard ti water cannon dagiti dua a barko ti Pilipinas ken nadadael pay ti raling ken canopy ti maysa kadagiti barko ti pagilian kabayatan a mangisaysayangkat ti patrolya ken resupply mission para kadagiti mangngalap a Pilipino iti lugar.
Nangiwayat pay ti narisgo a maniobra ken pananglapped kadagiti uppat a China Coast Guard vessels ken innem a maritime militia vessels.
