LAOAG CITY – Inrakurak ti Estados Unidos nga adda ti nagdur-asan ti panagsinnaritada iti Ukraine mainaig iti plano ti panaglippas ti gubat.
Inpasingked dagiti negotiators ti Ukraine ken Estados Unidos a nakasaganada nga ipakita ti “serious commitment to long-term peace” iti Russia kalpasan ti panagsinnaritada iti Moscow iti nasapa a paset ita a lawas a napaay a nagun-od ti balligi.
Inpakaammo da United States special envoy Steve Witkoff ken Rustem Umerov, Secretary ti National Security Council ti Ukraine a maibilang a “constructive discussions” ti naisayangkat a panagsinnarita idiay Florida.
Nupay kasta, inlawlawagda a nakadepende iti Russia ti panagngudo ti gubat iti nagbaetanda iti Ukraine.
Nagatendar iti nasao a negosasion ti manugang ni United States President Donald Trump a ni Jared Kushner tapno matratar dagiti kasapulan a katulagan para iti naan-anay a panaglippas ti rinnupak ti dua a pagilian.
Mainaig iti daytoy, basar iti Kremlin a nakasagana nga ituloy ni Russian President Vladimir Putin ti taripnong kadagiti Amerikano ngem kwinestionaran ti Ukraine ken dagiti kaalyadona iti Europa iti panangikagumaan ti Russian leader iti panagngudo ti gubat.
Kabayatanna, kalikagum ti Kyiv ti pannakarebisar ti United States peace plan.
