LAOAG CITY – Insardengen ti Amerika ti agarup amin a foreign aid daytoy basar iti internal memo a naipatulod kadagiti opisial ken United States embassies kadagiti nagduduma a pagilian.
Daytoy ket kageddan ti naiparuk-at nga executive order ni United States President Donald Trump idi Lunes para iti 90 nga aldaw a pannakaipasardeng ti foreign development assistance idinto a nakapenpen pay ti panagadal iti panagbalin nga episiente ken consistency daytoy iti foreign policy ni Trump.
Ti Amerika ti maibilang a kadakkelan nga international aid donor iti intero a lubong a nakagastos iti $68 billion idi 2023.
Gapu iti daytoy, manamnama a maapektaran ti pannakaipasardeng ti foreign aid manipud iti Estados Unidos ti amin manipud iti development assistance agingga iti military aid.
Nupay kasta, adda ti exceptions ditoy pakairamanan ti emergency food aid ken military funding para iti Israel ken Egypt.
Nailanad pay iti nag-leak a memo nga awan ti baro a pundo a mailatang para kadagiti baro nga awards wenno extension ti existing awards agingga a naan-anay a ma-review ken maaprobaran ti tunggal baro nga award wenno extension.
Naibilin ti nasao nga executive order ni Trump ti naiget a panagsukisok iti amin a foreign aid a nasken a makumpleto iti uneg ti 85 nga aldaw tapno maipasigurado ti nasao nga assistance a maiyataday kadagiti kalikagum ti foreign policy ni Trump.
Immunan nga inrakurak ni United States Secretary of State Marco Rubio a mapasamak laeng ti amin ti Estados Unidos spending iti dadduma a pagilian no naaramiden ti natibtibker, nataltalged ken nadurdur-as nga Amerika.
