LAOAG CITY – Nagpanawagan ti Estados Unidos ken dagiti kaalyado na a pagilyan iti Taliban nga isardeng dan ti mangpapatay kadagiti sigud a miembro ti Afghan security forces.
Iti joint statement, inpetteng dagiti 22 a nasyon a masapol a respetaren ti Islamist regime ti sinapataan da a saan a mangdangran kadagiti sigud nga adda iti gobierno wenno security personnel idiay Afghanistan.
Maalarma ti Amerika ken dagiti kaalyado na a pagilyan kalpasan nga adda dagiti reports a pammapatay ken panagpukaw lattan dagiti dati a miembro ti Afghan security forces a ti maitudtudo nga akin-aramid ket dagiti Taliban.
Immuna iti daytoy, iti inparuk-at a datos ti Human Rights Watch ket umaboten iti nasurok a 100 dagiti napapatay ken nakautibo a sigud nga Afghan government officials sipud nagturay ti Taliban idiay Afghanistan, addan agarop uppat a bolan ti napalabas.
Malaksid pay ditoy ti pannakapapatay dagiti 47 a miembro ti Afghan security forces a simmuko wenno natiliw ti Taliban sipud Agosto 15 agingga iti Oktubre 31 ita a tawen.
Nupay kasta, naiget a naglikudan amin ti Taliban dagiti alegasyon kontra kadakuada no sadinno nga inpetteng da a palubusan da ti siasinno man nga agimbestigar kadagiti nasao a pasamak.
