LAOAG CITY – Nakipagpaset ti Estados Unidos ken regional mediators iti maikatlo nga aldaw ti indirect talks iti nagbaetan ti Israel and Hamas idiay Egypt kagiddan ti plano ni United States President Donald Trump a malpasen ti gubat iti Gaza.
Nagatendar iti panagsarita da Steve Witkoff, Jared Kushner, Sharm el-Sheikh pakairamanan ti Prime Minister ti Qatar a ni Sheikh Mohammed ken Intelligence Chief ti Turkey a ni Ibrahim Kalin para iti panagdur-as ti nasao a gagem.
Segun iti senior Hamas official, nangisubmitir iti listaan dagiti balud a Palestino a kayatna a wayawayaan ti Israel a kasukat dagiti hostage a nakabalud idiay Gaza.
Nagturong da Witkoff ken Kushner a nagserbi ken ni Trump kas Middle East adviser idi umuna a terminona iti Red Sea resort ti Sharm el-Sheikh para iti nadakamat a panagsarita.
Gagem ni Sheikh Mohammed ti pannakaipatungpal ti Gaza ceasefire plan ken ti pannakawaya-waya dagiti hostages.
Naammoan a timmawag ni Trump ken ni Turkish President Recep Tayyip Erdogan no sadinno nga inbatadna kenkuana nga awisenna ti Hamas nga umannugot iti planona.
Mainaig iti daytoy, karaman iti listaan dagiti nalatak a balud a Palestino iti pagbaludan ti Israel ket da Marwan Barghouti ken Ahmad Saadat.
Kabayatanna, ni Saadat ket lider ti Popular Front for the Liberation of Palestine a nasentensiaan ti 30 a tawen kalpasan a nakumbiktaran idi 2008 a nangidaulo iti illegal terrorist organization, pannakainaiganna iti panangatake ken panangpapatay iti Israeli minister idi 2001.
