LAOAG CITY – Mangipaay ti gobierno ti Amerika ti $30 million para iti humanitarian aid iti war-torn territory a Gaza.
Maipaay ti nasao a tulong manipod iti US Agency for International Development iti Gaza Humanitarian Foundation (GHF) nga isu ti mapan agidandanun ti tulong iti Gaza.
Nupay nabayagen a supsuportaran ti Amerika iti diplomatiko nga aspeto ti nasao a grupo, daytoy ti kaunaan a gundaway a nangipaay ti Estados Unido ti pinansiyal a tulong iti organisasyon para iti Palestinian enclave.
Inaprubaran ti nasao nga humanitarian aid iti babaen ti priority directive manipod iti White House ken State Department no sadinno nga addan ti $7 million ti inisyal a na-disburse.
Segun pay iti dua a sources, possible nga aprubaran pay ti Estados Unidos ti nayun a binolan a grants nga agbalor ti $30 million para iti Gaza Humanitarian Foundation.
Ti nagbalin nga addang ti Amerika ket kalpasan ti immunan a naireport a panagkiddaw ti Israel iti administrasyon ni US President Donald Trump a mangipaay ti $500 million iti Gaza Humanitarian Foundation.
Inaramid daytoy ti Israel iti baet ti kumarkaro nga humanitarian crisis iti Gaza gapu iti agtultuloy a giyera iti nagbaetan da iti Hamas a nagresultan ti pannakatay ti nasurok a 57,800 a tattao no sadinno a 56,152 ditoy ket Palestinians idinto a 1,706 ti Israelis, basar iti datos ti Gaza Health Ministry.
