LAOAG CITY – Naiget a banbatayan ti Estados Unidos ti mapaspasamak a nalawa a tignay-protesta idiay Nairobi, Kenya.
Basar iti White House a napateg a solbaren ti gobierno ti Kenya ti nasao nga arungaing dagiti protesters.
Kadua ti Estados Unidos ti Canada, Britain, Denmark, Germany ken ti Netherlands ti nakigtot ken madanagan iti mapaspasamak a riribuk idiay Kenya.
Inbatad ti British High Commission a napateg nga irespetar ken itandudu ti kinakapia tapno saanen a kumaro pay ti riribuk.
Nakawarasen dagiti suldado iti kalsada ti Nairobi kas suporta kadagiti kapulisan.
Maipalagip nga adda ti innem a protesters ti natayen idi makarinnupak ti kapulisan iti sango ti parliamento.
Saan met a bumaba iti 40 a tattao ti nasugatan ti nagusar ti kinaranggas dagiti kapulisan kadagiti protesters.
Nagpupok met dagiti sumagmamano nga agpanpanday linteg iti parliamento kalpasan a pinalikawkawan isuda dagiti protesters.
Namunganayan ti kilos protesta iti plano a panagngato ti buis kadagiti magatgatang.
Depensa ti gobierno a napateg ti panagngato ti buis tapno makissayan dagiti panagutangda.
Basar iti proposal nga addaan ti 16 a porsiento a buis ti mainayun kadagiti tinapay ken 25 a porsiento a tax met kadagiti cooking oil.
Inpasigurado met ni Kenyan President William Ruto a pagtalinaedenna ti kinakappia.
Mamati daytoy nga adda ti panangiduron dagiti kriminal kadagiti protesters isu a nagwarasda kadagiti kalsada.
