LAOAG CITY – Naminsan manen nga inpasingked ti Estados Unidos a nagtalinaed a buo pay laeng ti suportada idiay Ukraine.
Iti panagbisita ni United States Secretary of State Antony Blinken iti Ukraine ket inpadanonna ken ni Ukrainian President Volodymyr Zelensky a kalikagum ti Estados Unidos nga agballigi ti Ukraine kontra iti Russia.
Inbatadna a tapno mapasamak daytoy ket saanda nga agsarsardeng a mangipaay ti tulong iti Ukraine.
Kunana a tumulong ti Estados Unidos iti Ukraine tapno agbalin a miembro daytoyen iti North Atlantic Treaty Organizaton.
Manamnama nga aglippas ita a bulan ti bilateral security agreement no sadino iti uneg ti 10-year agreement ket suportaran ti Estados Unidos ti defense and security ti Ukraine.
Maipalagip a pinaigetan ti Russia ti opensibada iti Ukraine no sadino inadmitir ti Ukraine nga agkurkurangdan kadagiti miembroda ken napateg a maipaay dagus ti Estados Unidos ken sumagmamano a pagilian ti nagkari ti military aide para kadakuada.
