LAOAG CITY – Nangidiaya ti United States State Department ti $10 milyon a reward iti makaitudo ti ayan dagiti sumagmamano nga opisial ti Iran.
Karaman iti listaan ti baro a Supreme Leader a ni Mojtaba Khamenei.
Daytoy ket paset ti Rewards for Justice Program iti pinagtipon a panangatake ti Estados Unidos ken Israel idiay Iran a nangitunda ti pannakatay ni Ayatollah Ali Khamenei ken sumagmamano a nangangato nga opisial ti Iran.
Basar iti Amerika, dagiti nasao nga indibidual ket isuda ti mangibilbilin ken addaan ti direkta a bileg iti Islamic Revolutinary Guard Corps ti Iran nga agplanplano ken mangor-organisar ti terorismo iti intero a lubong.
Naammoan a ti sumagmamano nga adda iti listaan ti United States State Department ket pakairamanan da Minister of Intelligence Esmail Khatib; Deputy Chief of Staff Ali Asghar Hejazi; Major-General Yahya Rahim Safavi; Brigadier General Eskandar Momeni ken Secretary to the Supreme Council Ali Larijani.
