LAOAG CITY – Napaltogan ti maysa nga estudiante iti Binaratan Road iti Brgy. Cali iti ili ti Dingras.
Nabigbig ti biktima a ni John Restie Decamos y Mallari, agtawen ti 19, residente ti Sitio Malasin iti Brgy. Lanas iti ili ti Dingras idinto a saan pay a nabigbig ti suspek.
Segun ken ni P/Capt. Roi Manuel Ordonio, Hepe ti Dingras Municipal Police Station, nakalugan ti motorsiklo ti biktima ken ti kaduana a maysa met nga estudiante a nagturong iti maysa a gasoline station.
Inbatadna a kadayta a gundaway, adda ti nabara a panagsinnungbat ti biktima ken ti saan pay a nabigbig a suspek a kwinestionaran ti suspek ti biktima no apay a kitkitaenna isuna.
Nupay kasta, kunana a simmungbat ti biktima ket inbagana a ti suspek ti mangkitkita kenkuana.
Mainaig iti daytoy, inpakaammo ni P/Capt. Ordonio a kalpasan a nakapagasolina ti biktima ket nagturong daytoy nga agpa-abagatan iti Binaratan Road nga agturong iti Brgy. Cali.
Inlawlawagna a sinurot ti suspek ti biktima ket ditoy a pinaltoganna iti naminsan a daras iti akin-kannawan nga abaga ti biktima a dagus met a naitaray iti Gov. Roque B. Ablan Sr. Memorial Hospital ditoy siudad ti Laoag.
Naammoan a narekobre iti nakapasamakan ti insidente ti maysa a pedaso ti deformed fire cartridge ti Cal 45., maysa a pedaso ti bull cup ken maysa nga unit ti cellphone idinto a dagus a naglibas ti suspek iti saan pay a masinunuo a direksion.
Kabayatanna, narekobre pay dagiti otoridad ti maysa a pedaso ti live ammunition ti cal. 45, tallo a pedaso ti Fired Cartridge Cases ti cal. 45 ken maysa a pedaso ti fired bullet.
Iti agdama, agtultuloy pay laeng nga agpapaimbag ti biktima iti ospital.
