LAOAG CITY – Pimmusay ti maysa nga estudiante kalpasan a naitapwak iti irigasion iti naglugananna a kotse iti nagbedngan iti Brgy. Bagbag ken Brgy. Capurictan iti ili ti Solsona.
Segun ken ni Police Captain Randy Damo, Hepe ti Philippine National Police iti nasao nga ili, nabigbig ti biktima nga agtawen iti 19 ken residente ti Brgy. San Esteban iti ili ti Dingras.
Inbatadna a basar iti insayangkatda nga imbestigasion, kabayatan a dumaldalyasat ti kotse nga agmaris ti gray nga agturong nga agpa-laud ket saanna a naripar ti nakabunton a darat.
Gapu iti daytoy, inpalgakna a nadungpar ti driver ti kotse ti nakabunton a darat a nangitunda ti pannakaitapwakna iti irigasion.
Inlawlawagna a nagsagaba ti sugat ti biktima iti nagduduma a paset ti bagina kangrunaanna iti ulo no sadinno naitaray dagus iti kaasitgan nga ospital ngem naideklara a dead on arrival babaen ti Attending Physician.
Innayonna nga adda ti driver’s license ti maseknan nga estudiante a nangiturong ti kotse.
Kabayatanna, naammoan a ti nasao a kotse ket adda iti kustodiar ti Philippine National Police iti ili ti Solsona para iti naan-anay a dokumentasion ken umno a disposision.
