LAOAG CITY – Manamnama a sumango iti kaso a panaglabsing iti Republic Act 10591 wenno Comprehensive Firearms and Ammunition Regulation Act ken COMELEC Resolution 11067 ti estudyante a nga agtawen ti 20 ken residente iti Barangay 2 iti ili ti San Nicolas.
Immuna iti daytoy, nagresponde dagiti kameng ti Philippine National Police iti Western Upper Stand/Bleacher iti Marcos Stadium bisinidad iti Brgy. 3 ditoy ciudad ti Laoag kalpasan nga adda ti maipagarop a napasamak a panagtakaw.
Basar iti report, kabayatan ti panagpractice dagiti tallo nga estudyante para iti maiyuswat nga SCUAA iti Marcos Stadium ket nakita da ti suspek a nakasuot ti uniporme ti College of Agriculture, Food and Sustainable Development iti MMSU a manguk-ukag kadagiti bag da isut gapuna a nagturong da a dagus iti ayanna.
Nupay kasta, sakbay a naasitgan dagiti biktima ti suspek ket nakatarayen daytoy no sadinno nga idi ininspeksyon da dagiti bagda ket naduktalan da a mapukpukaw dagiti pitaka ken kwarta da.
Dagus nga inreport da ti napasamak iti nakaduty a kameng ti pulisya iti Protect Box a masarakan iti Ferdinand E Marcos Stadium Rotonda.
Iti panangiyuswat dagiti otoridad ti naan-anay nga imbestigasyon ket natiliw da ti suspek iti paset ti Agbayani Street bisinidad iti Brgy. 2, Sampaloc, ditoy ciudad Laoag.
Nakumpiskar pay dagiti otoridad iti ikot ti suspek ti maysa a bala para iti Caliber 45; maysa a black wallet a naglaon ti nagdudum nga Identification Cards ken P461.00; maysa a Tactical Knife; karaman dagiti pitaka ken kwarta dagiti biktima.
Iti agdama, nagtalinaed ti suspek iti Philippine National Police ditoy ciudad ti Laoag.
