LAOAG CITY – Nagbalin nga emosyonal ti maysa nga estudyante kalpasan a nagbalin a biktima ti budol-budol gang ditoy ciudad ti Laoag.
Nabigbig daytoy a ni Maria Crisselle Tabasog, agtawen ti 21, estudyante iti Mariano Marcos State University (MMSU ken residente iti Barangay Hilario, Banna, Ilocos Norte.
Inlawlawag na a kalpasan ti panangirwar na ti kwarta ti maysa a bangko iti sentro ditoy ciudad ti Laoag ket adda ti nangdungpar kenkuana a maysa a babai.
Kuna na a nagsaludsud kenkuana ti babai no adda iti ammo na a mabalin a marentaan a truck a pagluganan da a mapan idiay ili ti Pagudpud.
Inbatad na a kalpasan ti sumagmamano a gundaway ket adda met ti maysa a lalaki nga immasideg ken inpakaammo na nga adda ti paparentaan na a truck.
Innayon na a nakisarita ti lalaki a mapan da kitaen iti babai ti truck ngem inbilin da nga agbati latta daytoyen ken iggaman na ti bag nga ayan ti kwarta ti maseknan a maipagarop nga agdagop iti agarop 200 a ribo a pisos.
Inpakaammo na a sakbay a pimmanaw dagiti dua ket binulud da ti cellphone na ken nakisarita ti babai nga iggaman na lattan dagiti gamit na a pakairamanan ti bag na nga ayan dagiti agkakapateg a kagamitan na.
Nakigtot laengen ni Tabasog idi maduktalan na a ti karga ti bag nga inpaiggem ti babai ket nakarkartib nga ado a papel.
Karaman kadagiti naitaray dagiti dua ket ti cellphone ken nagduduma a napapateg a kagamitan ni Tabasog, pakairamanan ti cash nga agdagop amin iti 5,500 a pisos.
Malaksid iti daytoy, inted pay ni Tabasog ti PIN code ti account na nga adda karga na a 7 a ribo a pisos.
