LAOAG CITY – Nabirokan ti bangkay ti maysa a baro a nakabitin iti uneg ti pagtaengan da iti Brgy. Poblacion 4 iti ili ti Pasuquin
Segun kenni Police Lt. Jimmy Aganon, deputy chief of police, possible a nagbekkel ti baro iti tenga ti rabii ken nakita da laengen ti bangkay na a nakabitin iti uneg ti pagtaengan da itay pasado alas-kuatro ti parbangon.
Binigbig ni Aganon ti baro a ni Clyde Jeric Onnagan y Tunac, agtawen ti 21, maysa nga estudyante.
Inlawlawag ni Aganon a napan nakiinom ti baro kadagiti barkada na iti Brgy. Poblacion Uno ken naibaga na ti personal a problema na kadagitoy.
Nupay kasta, saan a nailawlawag ti biktima ti problema na.
Kuna ni Aganon nga intulnog dagiti barkada na iti agarup alas-nuebe idi rabii agingga a nakita laengen ti lola na a nakabitin daytoy idi mapan na alaen dagiti tagilako na iti uneg ti pagtaengan ti baro.
Inbunannag na a narekobre da ti cellphone ti baro ken adda ti maipagarup a kumunikasyon da iti nobya na seknan iti problema wenno saan a panagkinnaawatan.
Kabayatanna, kuna ni Aganon a napaneknekan a nagbekkel ti baro babaen ti panangduktal ti doktor manipud iti rural health unit iti nasao nga ili.
Inbatad ni Aganon nga agmaymaysa ti baro nga agbibiag iti pagtaengan da gapu ta ti ama na ket adda iti Saudi Arabia idinto ti ina na ket dua a tawenen a saan da nga ammo iti lugar na gapu ta maipagarup a nagsina da iti ama ti baro.
Saan pay a maibaga ni Aganon ti rason iti panagbekkel ti biktima.
Kabayatanna, saan a naripar a dagus ni Erlinda Sosa, lola ti biktima, a natayen ti apoko na.
Daytoy ket kabayatan iti panangala na kuma kadagiti tagilako da iti pridyidir iti uneg ti pagtaengan ti biktima.
Kuna na a pinagunian na pay laeng apoko na kalpasan a nakita na a nakatakder daytoy.
Gapu ta saan nga aguni, kuldingen kuma ni Sosa ngem naripar na nga adda tali iti tengnged ti apoko na.
Gapu iti daytoy, nakarikna ti panagdanag ni Sosa ken dagus nga inayaban na ti barangay chairman.
Mainaig iti daytoy, awan ti ammo ni Sosa a rason iti panagbekkel ti apoko na gapu ta no kasarita na ket nasayaat met dagiti sungbat na.
Inbunannag ni Sosa a basar kadagiti linaon iti mensahe iti cellphone ti apoko na ket maipagarup a saan a sumungsungbat ti nobya na.
Inpasingked na a nasingpet apoko na.
