LAOAG CITY – Nagkampeon iti super spelling bee ti estudyante manipod ti Mariano Marcos State University – Laboratory High School iti ciudad ti Batac.
Segun ken ni Ms. Gab de Luna, ti Public Relations Officer iti dakkel a mall ditoy ciudad ti Laoag, ti nasao nga estudyante ket ni lyan Francia M. Suruet.
Kuna na a manipod iti 150 a partisipantes manipod kadagiti nagduduma a pagadalan ditoy probinsiya ket maymaysa iti naideklarar a nangabak ken makipartisipar iti grand finals iti Mall of Asia intono Oktubre 4 ita a tawen.
Inbatad ni de Luna a ti nangabak nga estudyante ket makaawat ti 20k worth of gift certificates.
Inpakaammo ni de Luna a daytoyen ti maikadwa a tawen a naisayangkat ti aktibidad, ngem gapu ti kaado dagiti nakipartisipar ket plano da nga iwayat iti kada tawen.
Inlawlawag na a ti super spelling bee ket gagem na a makita ken marukud ti kinalaing dagiti estudyante iti benneg ti spelling.
Kabayatanna, nagyaman ni lyan Francia Siruet kadagiti kaklase, mangisursuro ken nagannak na iti panangsuporta da kenkuana iti pannakisalip na iti nasao a kompetisyon.
