LAOAG CITY – Natay ti maysa nga estudyante a lalaki kalpasan a nadesgrasya iti national highway bisinidad ti Barangay Balaoi iti ili ti Pagudpud.
Segun ken ni Police Major Edward Santos, ti chief of police iti ili ti Pagudpud, ti biktima ket agtawen ti 19, estudyante ken residente iti Purok 3, Barangay Poblacion iti ili ti Adams.
Basar iti imbestigasyon ti PNP-Pagudpud, agpapa-amyanan a direksyon ti biktima a nakalugan ti motorsiklo ken idi nadanun na ti agkurba a paset ti kalsada ket napukawan ti kontrol iti manibel rason a agderderetso iti kanal nga adda iti igid ti kalsada.
Gapu iti daytoy, naitupar ti ulo ti biktima iti sementado a paset ti kanal a nangitunda iti ipapatay na.
Inbaga ni Santos a basar iti imbestigasyon da ket naggapo ti biktima iti maysa a pagayam na ken rumrumuar a nakainom ti nasanger idi napasamak ti insidente.
