LAOAG CITY – Kinumpirmaran ni Ms. Cherry Joy Garma, information officer iti DepEd Division of Laoag a maysa nga estudyante iti Ilocos Norte National High Schoool ti naglaslas iti uneg ti classroom da.
Segun ken ni Garma, napasamak ti insidente idi bigat ti Nobiembre 17.
Kuna na a bayat nga iyur-uray dagiti estudyante ti panangrugi ti maikadua a klase da ket dita a naripar dagitoy nga adda ti maysa a classmate da ti naglaslas.
Inbatad na a gapu iti daytoy, dagus a nagpaarayat dagiti kaklase ti estuydante kadagiti mangisursuro ken insegida a naipaayan medical assistance.
Mainaig iti daytoy, kuna ni Garma a pinaayaban nga isegida ti pagadalan ti ina ti estudyante ken dita a naiyakar daytoy iti Governor Roque Ablan Senior Memorial Hospital para iti naan-anay a pannaka-agas ti sugat.
Inbatad na a kageddan daytoy ti pannakisarita dagiti school officials iti ina ken kasta met iti estudyante.
Inpakaammo ni Garma a saan met pay laeng a napalubusan a sumrek iti pagadalan ti estudyante tapno makarekobre ken addan ti ti naiyuswat a debriefing kadagiti agad-adal a nakakita ti panaglaslas daytoy.
Kabayatanna, inbaga ni Garma a daytoy ti umuna nga insidente ti panaglaslas a nairekord iti nasao a pagadalan.
Saan metten nga inbuksilan ni Garma ti kangrunaan a rason iti panaglaslas ti biktima kas panangprotehir iti kinatao daytoy ken panangrespetar iti karbengan na gapu ta sensitibo ti isyu.
Nagpalagip ti information officer kadagiti estudyante nga ipakaammo dagiti problema iti nagannak wenno kadagiti mapagtalkan a tattao tapno makissayan dagiti parikot.
Innayun na nasken met a sidadaan nga agdenngeg dagiti nagannak iti annak da ken awaten ti sitwasyon dagitoy tapno saan da a mapanunot ti agaramid ti dakes.
