LAOAG CITY – Pinalubusan ti Commission on Elections dagiti miembro ti European Union (EU) Election Observation Mission a sumrek kadagiti polling places ngem daytoy ket kalpasan a makabotos dagiti botante ita nga aldaw, Mayo 12.
Immunan a kiniddaw dagiti European Union observers a sumrek da kadagiti polling places kabayatan ti panagbotos ngem saan a pinatgan ti Commission on Election gapu ta mailabsing daytoy iti paglintegan ti pagilian.
Inbatad ni Commission on Election Chairman George Erwin Garcia a mabalin laeng ti sumrek dagiti European observers no maiyuswat ti printing ti election returns, posting ti election returns ken ballot review.
Inpalgak ni Garcia a no addan to man ti isurat dagiti maseknan mainaig iti naobserbaran da kabayatan ti eleksyon ket isu ti naiget a panangipatungpal ti ahensya ti paglintegan ti pagilian.
Maipalagip a nagturong dagiti European Observers iti pagilian gapu ta inimbitaran dagitoy ti gobierno.
