LAOAG CITY – Kalikagum dagiti European Leaders nga agbalin a miembro ti Ukraine iti North Atlantic Treaty Organization wenno NATO.
Segun ken ni Bombo International News Correspondent Rene Ballenas manipud idiay Estados Unidos, daytoy ket kalpasan a kadagupan kadagiti amin a nagatendar iti taripnong nga indauloan ni United States President Donald Trump ket ti Ukraine laeng ti saan a miembro iti nasao nga organisasion.
Inbatadna a basar iti Article 5 iti Charter ti Treaty ti North Atlantic Treaty Organization ket no bilang ti maysa a pagilian a miembro iti North Atlantic Treaty Organization ket rinaut ti aniaman a pagilian ket makiraman dagiti amin a miembro iti daytoy.
Inlawlawagna nga inpetteng ni Ukrainian President Volodymyr Zelensky a saanna nga ited ti Crimea iti Russia uray adda ti singasing ni Trump kenkuana nga ipaayna daytoyen tapno malpasen ti gubat gapu ta ibilang ti Ukraine ti Crimea kas naval base.
Innayonna a manamnama ti pannakaiyuswat ti trilateral meeting da Trump, Zelensky ken Russian President Vladimir Putin mainaig iti naan-anay a ceasefire iti nagbaetan ti Russia ken Ukraine.
