LAOAG CITY – Inbatad ni Bombo International News Correspondent Virgie Maranan Oao iti Santa Maria, California nga agtultuloy ti wildfire iti nasao nga estado.
Segun ken ni Oao, immabot iti 100 degrees fahrenheit ti temperatura iti lugar da iti naglabas nga aldaw gapu iti kinapigsa ti uram kadagiti kabangibang a lugar.
Kuna na nga arig nga agmaris amin ti kahel ti tangatang ken nabengbeng ti asok gapu iti agtultuloy nga uram.
Mainaig iti daytoy, inpakaamo na a ti agarup 45 a ribo nga evacuation center nga insagana ti gobierno ket agkurkurang gapu iti kaado dagiti residente a naapektaran.
Inbaga na nga umaboten iti nasurok tallo a milyon nga ektarya ti natupar ti uram nu sadino nga addan 7,718 nga insidente ti wildfire.
Iti naudi a datos, umaboten iti 20 a tattao dagiti natay iti nasao nga uram.
