LAOAG CITY – Nakagun-od ti world record ti maysa nga annual cooking competition kalpasan a nakaaramid ti nagduduma a putahe ti kalapati.
Kinumpirmaran ti Guinness World Records a ti event a 3rd Pigeon Dishes Competition ti baro a record holder ti titulo a ‘Most Varieties of Pigeon Dishes on Display,’ kalpasan a nakaluto dagiti nakipaset a chefs ditoy ti 500 dishes a naaramid iti Shiqi Squab wenno Young Pigeons.
Naiyuswat ti event iti Zhongshan City idiay Guangdong Province idi Setiembre 28.
Inatendaran daytoy dagiti 50 a grupo ti chefs manipud kadagiti nalalatak a restaurant, culinary brands ken food companies.
Tunggal grupo ket nagaramid ti sag-sangapulo a putahe babaen iti 28-day-old a kalapati.
Iti uneg ti 90 a minuto, nakaluto dagiti chef ti 500 dishes ken kinumpirmaran dagiti adjudicators ti Guinness a tunggal putahe ket unique ken awan ti naulit uray maysa.
Kalpasan ti event, nangiyawid ti takeout ti amin a napan nagatendar iti event tapno maliklikan ti pannakasayang dagiti taraon.
