LAOAG CITY – Nasentensyan ti agtawen ti 70 a ni dati a Brazilian President Jair Bolsonaro a mabalud ti 27 a tawen ken tallo a bolan kalpasan a napaneknekan a guilty iti panagplano ti kudeta.
Maysa a panel ti lima nga huwes ti Korte Suprema ti nangipaulog iti sentensya, sumagmamano laeng nga oras kalpasan a nasentensiyaan ti dati a lider.
Inpetteng ti korte a guilty ti dati a presidente iti panangidaulo na ti gandat a kudeta tapno agtalinaed daytoy iti pwesto kalpasan a naabak idi 2022 election babaen ti napinget a kalaban na iti pulitika a ni Luiz Inácio Lula da Silva.
Uppat kadagiti huwes ti nangibaga a guilty ni Bolsonaro idinto a ti maysa ket nagbotos para iti pannakaibasura ti sangsangwen na a kaso.
Mainaig iti daytoy, inawagan dagiti abogado ni Bolsonaro ti sentensya na kas “absurdly excessive” ken inkari da a mangipila da ti maiyannatop nga apela.
Malaksid iti pannakasentensya ni Bolsonaro ti 27 a tawen a pannakabalud ket ipawil payen ti Korte Suprema ti panagpaidasig na iti aniaman a posisyon iti gobierno agingga iti 2060, walo a tawen kalpasan a maiturpos na ti sentensya na.
