LAOAG CITY – Sumango manen iti korte ni dati a Negros Oriental Representative Arnolfo ‘Arnie’ Teves Jr. kadagiti sangsangwen na a kaso sipud idi naarestar ken naisubli ditoy Pilipinas manipod idiay Timor Leste.
Nakaskedyul ti sumaruno a maiyuswat nga arraignment intono Hunyo 10 ti agdama a tawen.
Daytoy ti kinumpirmaran a mismo ti abogado na a ni Atty. Ferdinand Topacio kagiddan ti panangipasingked na a naan-anay a nakasagana tapno depensaan ti kliyente na kadagiti akusasyon kontra kenkuana.
Ti baro nga skedyul iti panagdengngeg iti kaso ti dati a kongresista ket maiyuswat iti Manila Regional Trial Court Branch 51 iti oras ti alas dos ti malem.
Namnamaen a maipanggep daytoyen iti nakainaigan ni Teves a kaso ti pannakapapatay ni dati a Negros Oriental Governor Roel Degamo ken sumagmamano pay a biktima idi 2023.
Maipalagip nga iti kallabes ket adda ti mosyon ti kampo ni Teves a pagbalinen laeng a video conference ti panagatendar na kadagiti arraignments para iti pagsayaatan na, kangrunaan na iti seguridad ti dati a kongresista.
