LAOAG CITY – Inarestar dagiti pulis babaen ti Ilocos Norte Police Provincial Office ti dati a mayor ti Dingras ken nagpaidasig a kongresista iti segundo distrto ti Ilocos Norte a ni Marynette Gamboa gapu iti kaso a murder.
Daytoy ket babaen ti warrant of arrest nga inparuk-at ti Regional Trial Court Branch 17 babaen kenni Judeg Philip Salvador kontra kenni Gamboa.
Segun kenni Atty. Juanito Antonio, Legal Counsel ni Gamboa, saan da a maawat ti warrant of arrest gapo ta saan a nainkalintegan ti pannaka-issue ti nasao a warrant of arrest.
Inlawlawag na nga existing pay laeng ti order ni Judge Conrado Ragucos, dati a mangig-iggem iti kaso mainaig ti inpila ti prosecution a 2nd Ammended Information.
Kunana nga awan ti rumbeng a maadmitir ti 3rd Ammended Information a naipila nga isu ti naggapoan ti warrant of arrest.
Impetteng na a saan a napigsa ti ebidensya ti prosecution isu a mangipila da ti motion for bail.
Inikkan ti Prosecution Office ti 10 nga aldaw ti kampo ni Gamboa tapno mangsubat iti nasao nga akusasyon.
Kabayatanna, mangnamnama ni INEC Board President Enrico Ruiz a malawlawagan ti pannakapapatay ti ama na a ti dati nga INEC Board President Lorenzo Rey Ruiz idi Setyembre 4, 2009 iti INEC substation idiay Lang-ayan, Currimao kalapsan ti pannakaarestar ti akusado a ni Gamboa.
Kunana a respearen na ti opinyon ti legal counsel ni Gamboa wenno anyaman nga addang ti aramiden da, ken makaammon tonti korte a mangtratar iti nasao nga isyu.
Mainaig iti daytoy, naitaray iti ospital idiay Camp Crame ni Gamboa kalpasan a ngimmato ti blood pressure na.
