LAOAG CITY – Kalikagom ni dati a Presidente Rodrigo Duterte a ma-cremate ti bangkay na sakbay a maiyawid iti Pilipinas no matay daytoy kabayatan a nakabalud iti The Hague, Netherlands.
Daytoy ti inpakaammo ni Vice President Sara Duterte kalpasan ti panangbisita na manen iti ama na idiay Netherlands.
Segun iti bise presidente, nasaysayaat no maamoan ti amin dagiti kalikagom maudi a tarigagay ti dati a presidente tapno maipatungpal amin no mapasamak ti panangisublin ti ama na ti bukod na a biag.
Innayon ti bise presidente a gagangay para iti agtawen ti 80 ti agpanunot kadagiti kayatna a maaramid no madanun ti ipupusayna.
Immunan nga inrakurak ni Vice President Duterte a dakkel ti nagkuttongan ti ama na sipud nabalud idiay The Hague ken inladawan na daytoy iti agdama kas kudil ken tulang.
Maipalagip a naarestar ni dati a Presidente Duterte idi Marso 11 ita a tawen babaen ti warrant of arrest nga inparuk-at ti International Criminal Court (ICC).
Iti agdama ket nakabalud ti dati a presidente iti Scheveningen Prison iti The Hague gapu kadagiti kaso na a crimes against humanity para iti extrajudicial killings iti inpatungpal ti administrasyon na a giyera kontra iti illegal a droga ditoy pagilian.
