LAOAG CITY – Plano ni dati a Presidential spokesperson Harry Roque nga agpila ti depensa na iti babaen ti counter-affidavit iti reklamo nga human trafficking kontra kenkuana.
Nupay kasta, nagtalinaed ti takder ni Atty. Roque a saan a personal a sumango iti Department of Justice.
Kuna na nga agsapata iti awtentisidad ti counter-affidavit na iti piskal iti sabali a legal entities imbes nga iti Department of Justice.
Inrakurak daytoy ni Roque kalpasan a nagpila dagiti otoridad ti supplemental complaint affidavit kontra kenkuana, no sadinno nga immunan nga inraman da daytoy iti inisyal a trafficking complaint kontra iti awtorisado a representative ti Lucky South 99 a ni Cassandra Li Ong.
Naiget a naglikudan ni Atty. Roque dagiti akusasyon ken inpetteng na a saanen a baro dagiti ebidensya kontra kenkuana ken nalawag a naar-aramid laeng dagiti kaso.
Mangnamnama ni Roque nga aramiden ti piskal ti trabaho da.
Inpaganetget pay ni Roque nga awan ti ebidensya a nag-recruit isuna wenno nagusar ti pwersa tapno mapagtrabaho na dagiti tattao ken awan ti ebidensya ti panagkukunsabo wenno conspiracy.
