LAOAG CITY – Inladawan ni Orly Guteza, dati a security aide ni Ako Bicol Party List Rep. Zaldy Co, no kasanu a maipatpatulod dagiti maleta a naglaon ti minilyon a cash a maipagarop a paset ti kickbacks nga adda ti pakainaigan dagiti maanomalya a flood control ken infrastructure projects.
Iti panagdengngeg ti Senate Blue Ribbon Committee mainaig iti kickback scheme manipod kadagiti nasao a proyekto, inukir ni Sen. Erwin Tulfo no namin-ano a daras a napan nangikabil ti kwarta ti dati a security aide ni Cong. Co iti balay ni dati nga House Speaker Martin Romualdez.
Insungbat ni Guteza a namintallo a daras a napan nangikabil ti kwarta ken ni dati nga House Speaker Romualdez no sadinno nga iti damo ket 35 a maleta ti intedna.
Segun pay ken ni Guteza, tallo a lugar a kukua ni Cong. Co karaman ti bulletproof, ti nausar iti nasao a transaksiyon.
Iti maikadwa a gundaway ket adda iti 12 agingga iti 13 a maleta ti maipagarop a naipaay idinto a 15 a maleta iti maikatlo a gundaway.
Kinalkal pay ni Sen. Erwin Tulfo no mano ti linaon dagiti maipatpatulod a maleta ket insungbat ni Guteza, nga agbalor ti P48 million ti kada maleta.
Dinamag met ni Senate Blue Ribbon Committee chair Sen. Panfilo Lacson ti contractor nga agasawa a Discaya nga ibilangna a narwam met a makaig-iggem ti kastoy ti kadakkel na a kwarta.
Simmungbat ni Pacifico “Curlee” Discaya nga arigna agpada iti nagbalin a rakurak ni Guteza.
