LAOAG CITY – Maragsakan ni Vice mayor Rey Carlos Fariñas iti naimballigian a pannakaisayangkat ti Executive and Legislative Agenda ti gobierno lokal ti ciudad ti Laoag idiay Tagaytay City.
Segun iti bise mayor, kadagiti naglabas a sesyon ket awan ti quorum ti Sang Panlungsod gapo ta manmano laeng dagiti agat-atendar.
Nupay kasta, kuna na nga iti naisayangkat nga Executive and Legislative Agenda ket ado dagiti nakipaset ken nagbalin a produktibo ti nasao a programa nga indaulwan ti Department of Interior and Local Government ditoy ciudad ti Laoag.
Inbatad na nga iti agdama ket ur-urayen da ti pinal a plano nga isubmitir ti ehekutibo tapno maipresentar dagiti legislative agenda ti konseho a maiyannatop kadagitoy.
Innayon na a ti maysa kadagiti kangrunaan a gagem da kalpasan ti Executive and Legislative Agenda ket ti pannaka-update dagiti codes ditoy ciudad ti Laoag.
Maipalagip a nagturong dagiti opisyal ti gobierno lokal ditoy ciudad ti Laoag idiay Tagaytay City tapno para iti Executive and Legislative Agenda no sadinno a ditoy a naplano dagiti development plan ti lokal a gobierno iti uneg ti tallo a tawen.
Malaksid kadagiti opisyal ket nagatendar pay dagiti mangidadaulo kadagiti nagduduma nga opisina ti gobierno lokal ditoy ciudad.
