LAOAG CITY – Ibilang ni Mr. Sonny Africa, Executive Director ti Ibon Foundation a kurang ti agdama a minimum wage kadagiti mangmangged ditoy pagilian.
Segun kenkuana, ti gobierno babaen ti National Wage Productivity Commission ket saannan a kunkuntaren ti daily family living wage.
Inbatadna a basar iti panangkuntarda ti daily family living wage para ditoy rehion uno ket dumanon iti 1,144 a pisos.
Inlawlawagna a kadagupan kadagiti amin a rehion ditoy pagilian pakairamanan ti National Capital Region ket kurang ti agdama a sueldo dagiti mangmangged.
Gapu iti daytoy, para ken ni Africa ket adda ti dakkel a problema ti pagilian maipapan iti sueldo dagiti mangmangged banag a masapol a tutukan ti gobierno.
Mainaig iti daytoy, basar iti panagsukisokda ket adda dagiti gundaway a nanginngina ti presio dagiti magatgatang a produkto iti Metro Manila no idasig kadagiti probinsia.
Nupay kasta, kunana nga adda met ti gundaway a nalaklaka ti presio dagiti magatgatang a produkto ditoy probinsia no idasig iti Metro Manila.
Innayonna a ti makitkitana a solusion tapno maalay-ayan ti mapaspasaran a panagrigat iti biag dagiti naruay a Pilipino ket ti pannakaipangato ti sueldo dagiti mangmangged.
