LAOAG CITY – Mamati ni Mamamayang Liberal (ML) Party-list Rep. Leila de Lima a ti extradition ken ni Pastor Apollo Quiboloy ket mabalin latta nga isayangkat dagiti otoridad ditoy Pilipinas uray saan pay a naresolbar dagiti kasona ditoy pagilian.
Daytoy ket kagiddan iti agtultuloy a takder dagiti dadduma a saan a mabalin a palubusan ti gobierno ti kiddaw ti Estados Unidos para iti extradition kabayatan a maiyur-uray ti panangresolbar kadagiti kaso ti founder ti simbaan ti Kingdom of Jesus Christ (KOJC).
Ni Quiboloy a nagpabigbig nga “Appointed Son of God,” ket birbiruken ti Estados Unidos gapu kadagiti kaso daytoy a sex trafficking, bulk cash smuggling ken dadduma pay.
Ak-akusaran ti Estados Unidos ni Quiboloy ken dagiti kakaduana iti pananggundaway kadagiti miembro ti simbaan pakairamanan dagiti menor de edad.
Kabayatanna, ditoy Pilipinas, ni Quiboloy, maysa nga spiritual adviser ken nasinged a pagayam ni dati a Presidente Rodrigo Duterte ket sumangsango pay ti kaso ti human trafficking ken child abuse nga inpila dagiti dati a miembro ti simbaan a maipagarup a sexual exploitation ken coercion.
