LAOAG CITY – Inlawlawag ti maysa a private lawyer a ni Atty. Elreneo Kidd Castro ti maipanggep iti extradition treaty.
Daytoy ket kalpasan nga inrakurak ni Presidente Ferdinand Marcos Jr. ti plano da nga agaplikar ti extradition treat iti Portugal tapno makemmeg ni dati a Congressman Zaldy Co a maatap nga aglemlemmeng iti nadakamat a pagilian.
Segun ken ni Castro, ti extradition treaty ket ti pannakaiyakar ti maysa a tao manipod iti maysa a pagilian, maikabil iti sabali a pagilian.
Nupay kasta, kuna na a saan nga amin a gundaway ket pakaipatungpalan ti extradition treaty no di ket adda dagiti masurot a proseso.
Inrakurak ni Atty. Castro a masapol nga amwen ken siguradwen nga umuna no ti maysa nga indibidual ket adda iti maysa a pagilian a pagaplikaran ti extradition treaty.
Malaksid iti daytoy, nasken a maamoan nga umuna no ti pagilian a paglemlemmang ti pugante ket addaan ti Extradition Treaty iti Pilipinas.
Napateg pay a maamoan no ti sangsangwen a kaso ti maysa nga indibidual ket extraditable Offense wenno political offense.
Innayon na a ti maysa pay a kangrunaan nga aramiden ti maseknan a pagilian ket ti sumurot iti due process.
Immunan nga inpasigurado ti Malakanyang nga aramiden amin ti gobierno ti Pilipinas tapno maisubli ditoy pagilian ni Co a nairaman kadagiti anomalya mainaig iti flood control projects.
