LAOAG CITY – Nasuspenso ti face-to-face classes iti pampubliko ken pribado a pagadalan iti ili ti Solsona, pakairamanan ti daycare centers mangrugi intono bigat, Setyembre 9, agingga iti 12, 2025.
Segun ken ni Mayor Joseh de Lara iti ili ti Solsona, maipatungpal ti Alternative Learning Modalities kabayatan ti pannakasuspenso ti face-to-face classes.
Ti nasao nga addang ti gobierno lokal ket kalpasan a bigla a ngimmato ti kaso ti Hand, Foot and Mouth Disease.
Inpakaammo ti mayor a sipud idi Enero ita a tawen ket nakairekord dan ti 151 a kaso ti nasao a sakit no sadinno nga ita laeng a bolan ti setyembre ket addan ti 76 a kaso nga ibilang na a makaalarma.
Inlawlawag na a dagiti amin nga agad-adal, mangisursuro ken non-teaching staff ket nabilin a dumalan iti preventive quarantine iti uneg ti tallo nga aldaw a pannakasuspenso ti face-to-face classes iti ili ti Solsona.
Mainaig iti daytoy, inrakurak ni Mayor de Lara a maisayangkat ti disinfection kadagiti pagadalan babaen ti Municipal Epidemiology and Surveillance Unit tapno masigurado ti kinatalged dagiti agad-adal ken mangisursuro manipod iti nasao a sakit.
Malaksid iti pannakasuspenso ti face-to-face classes, idadalan ti preventive quarantine ken ti maisayangkat a disinfection ket adda pay ti maipatungpal nga All-Day Curfew.
Kuna ni Mayor de Lara a masapol a mabantayan dagiti agad-adal, dagiti mangisursuro ken non-teaching staff tapno masigurado a saanda a rumrumuar kabayatan ti pannakasuspenso ti klase tapno saanen a maiwaras ti virus.
