LAOAG CITY – Naragsak ni Dr. Shirley Agrupis, presidente iti Mariano Marcos State University, a maiyuswaten ti full capacity iti face-to-face classes kalpasan nga inaprobaran ti IATF iti baet a nakaalert level 1 ti probinsya.
Gapu iti daytoy, maiyuswat ti full capacity face-to-face class intono Abril 1 ita a tawen para kadagiti addaan ti laboratory.
Segun kenni Agrupis, mapagsasaritaan pay laeng ita nga aldaw no kabaelan a maigeddan ti panagserrek dagiti estudyante nga agad-adal iti babaen ti flexible learning wenno dagiti awanan ti laboratory iti full capacity iti nasao a petsa.
Mainaig iti daytoy, inpakaammo na nga umabot pay iti 40%-45% kadagiti estudyante ti saan pay a simrek.
Agtalinaed a requirement ti panagbalin a bakunado dagiti estudyante ken dagiti faculty idinto kadagiti saan pay a nakakumpleto ti bakuna ket masapul a dumalan da iti RT-PCR test iti kada lawas wenno iti nairekomendar nga aldaw a dumalan da iti nasao a testing.
Saan a mailinged ni Agrupis iti panagpupulapol dagiti estudyante gapu ta nasurok dua a tawen a saan da a nagkikita iti pagadalan rason adda ti kondisyon a masapul a bakunado dagitoy.
Maipalagip a naipalubos ti limted face-to-face para kadagiti estudyante ti College of Medicine ken dadduma nga health and science program itay tawen 2021.
Simmaruno a naipatungpal ti flexible learning idi Enero 16, ken idi Pebrero 7 ita a tawen ket narugyan ti limited face-to-face classes para kadagiti addaan ti laboratory na iti isu amin a year level ken degree programs ken dagiti addaan ti lecture ket iti 4th year ken 5th year level.
