LAOAG CITY – Inpakaammo ni Mrs. Cherry Joy Garma, ti pannakangiwat ti DepEd schools division of Ilocos Norte nga amin nga elementary ken secondary school ditoy probinsya ket mapalubusanen a mangiyuswat ti progressive face-to-face learning modality.
Segun ken ni Garma, 318 kadagiti elementary schools ken 54 a secondary schools dagiti mangiyimplimenar iti nasao a modality.
Mainaig iti daytoy, inlawlawag na nga adda latta dagiti masurot a pagalagadan kabayatan ti panaglukat ti klase.
Inbatad a basar iti naipaulog a pagganurutan ket 12 laeng nga estudyante ti mabalin nga agklase iti maysa a classroom.
Kuna na a masurot ti alternate schedule wenno adda dagiti agklase iti bigat ken adda met iti malem.
Inpakaammo ni Garma a ti pannakaiyuswat dagiti klase ket adda koordinasyon kadagiti barangay ken local a gobierno.
Kabayatanna, kuna ni Garma nga iti panagngudo ti school year ita a tawen ket maipalubos metten ti face-to-face a pannakaipatungpal ti year-end wenno graduation rites ita a tawen.
Nu pay kasta, kuna na a limitado laeng dagiti maipalubos nga agatendar ken masurot dagiti pagalagadan kontra iti covid-19.
Kuna na a mangrugi ti closing exercises kadagiti pampubliko a pagadalan intuno Hunyo 27 agingga iti Hulyo 2 idinto a nasapsapa kadagiti pribado a pagadalan.
Mainaig iti daytoy, inbunannag ni Garma nga awan met ti masapol a bayadan iti panagturpos dagiti ubbing malaksid nu adda ti mapagtutulagan ti parent-teacher association.
