LAOAG CITY – Inlawlawag ni Police Lt. Col. Adrian Gayuchan, ti chief of police ti PNP-Batac nga awan ti kinapudno na ti agwarwaras iti social media nga adda ti mapukpukaw nga indibidual a maipagarop nga innala dagiti saan a mabigbig a tattao.
Segun kenni Gayuchan, napaneknekan da a palso a damag daytoy kalpasan ti pannakisarita na kadagiti nangi-share daytoy iti social media a rason ti pannakaalarma dagiti tattao.
Inbatad na a basar iti palawag dagiti nangi-share, naaramid da laeng daytoy gapo ta maalarma da met iti mabalin a mapasamak kadagiti annak da.
Gapo iti daytoy, binalakadan na dagitoy a saan a basta agi-share ti saan a beripikado nga impormasyon gapo ta maalarma laeng dagiti tattao.
Kinumpirmaran ni Gayuchan a ti rumrumuar a source iti daytoy nga impormasyon ket maysa nga estudyante iti Mariano Marcos State University (MMSU).
Kalikagom ita ti PNP a makasarita ti nasao nga estudyante tapno maamoan no sadinno ti nangalaan na daytoy nga impormasyon.
Mainaig iti daytoy, kuna ni Gayuchan a saan nga aramiden ti kastoy a banag gapo ta mabalin a mapilaan ti kaso nangruna no mapaneknekan.
Kabayatanna, binalakadan ni Gayuchan ti publiko nga agbalin a responsible iti panagipost iti social media.
